Act 4 | BJR | STEP | Peetooroosa Yoohaneesa faiqí ánaasee miqí qímasee Sooroomoona tidá átinni firaa amaana maqaki máruna qímannimimarufaqa amaana máqasaa aanáiqikirausa faqa amaana máqa poorísauqa faqa Sadikai ámaana ufa írimarusa faqa aniréeqa írimariqau.

Acts 4

Peetooroosa Yoohaneesa Kansóorauqa nífusaa kíkiqamáfufaqa mi-ufánara irámmiriqau.

1 Peetooroosa Yoohaneesa faiqí ánaasee miqí qímasee Sooroomoona tidá átinni firaa amaana maqaki máruna qímannimimarufaqa amaana máqasaa aanáiqikirausa faqa amaana máqa poorísauqa faqa Sadikai ámaana ufa írimarusa faqa aniréeqa írimariqau. 2 Peetooroosa Yoohaneesa Yísufa kúqiranakiqari fíndifunara faqa faiqí ánaasee faqa fíndififandínnanara faqa ámiqimasee faiqí ánaasee qímannimimarufaqa Yuda máqannaa rakísirausa anirée iriséeqa tautúmaseeqa qiqau, faiqí ánaasee Yísuna kúqiranakiqari fíndifunara iriséeqa maasá dári foora qímaseeqa áanoomasee Peetooroosa Yoohaneesa ruúmbeeqee karabúsa maqaki quqáqau. Eenéemarufaqa dóo súani átisaa márufanoo dúna ufa írianee qímasee maréeqee karafúsaki quqáqau. 4 Faiqí ánaasee moómoosa sía rakísirausa ufara eedóo qiqau. Peetooroona ufa iriséeqa moómoosa uqanna Yísunasaa írirana rusísoosa minásaa atooqáqau. Faifa tauséenna núkudara foora ira fasiqa ánaasee mi-karí minásaa atooqáqau.

5 Faiqée iqáqoo kanánaana Isaraee máqannaa faiqí úriqararausa faqa faiqí firaasá faqa Mooseena sándufa akoofásauqa faqa Yeerusaree máqusaki ufa súqimaru maqanaki súqimariqau. 6 Annasafa aanáiqikirausa úriqararafa faqa Kaiafasafa faqa Annasana áiku ásauku faqa indaarúqaa Yoohaneena amarána faqa Areekasandeerafa faqa misá aiqáma Yuda máqannaa faiqí firaasá faqa miqóo súqimariqau. 7 Misá miqandá Yísufa niqiqoo fásiqaqanda karafúsakinaana maréeqee nári nóorinni quqáqoofaqa áanóo ímasee irámmiridaqa qiqau. Ínneeqara náqi mándaafanoo fee áiku mandáikirafa fíndifinoo fee. Nána afeekannái fee miqí fee, yá fasiqana úfa fee íri fee maaqí fee.

8 Peetooroofa náaquqara maraquna minakí qumbíqafunara fíndifinoo paasóosamandee maaqí qímasee misá qímanniminau. Óo maa-fasiqáusa faiqí firaasá faqa rakísirausa faqa qiní ufa íriaqa. 9 Ínnee maasá áiku mandáikirana dadaaqí fíndifumásaunnanara ínnee mináree maasá iraídee. 10 Ínnee faqa Isaraee máqannaasa aiqáma írifaqa miná óosana qímannimianaura. Maa-fasiqáfa kísaaqasaa áiku mandáikinoo márufa márifaqa maqee ámiqirafa ínni nífusaa kikíqinoo máridanoo. Yísufa Ánutuna ásauku mundírafa Nasareeteendáraa fasiqa ínnee aunírira saqarisaa pirímmannai arusoofanoo Ánutufa miná kúqiranakinaana uqéera quqásoofa miná áuqu afeekannái maa-fasiqáfa fíndifinoo máridanoo. 11 Tamummáqara fasiqa ákara Yísunara maaqí qímasee ákara rúmaqoofa máridanoo.

Ínnee máaqa usakéemarusa faakánara fídiaqaamasee tatú áqusoofa
Narí kai sabéena afeeka faakana fannoo fíndifinoo rakíqanoo máridanoo.
Tamummáqara fasiqa ufa miqímasee Yísunara ákara rúmaqoona ínnee sía írirai mi-maú kai fídaqa miná arusoofanoo narí fíndifinoo máridanoo. (Mi-aukuanná óoninnai kai usakée maríqau. Maasá sabéenannai máaqa usakée marúna márifaqa óoniara sabéena kíkiqusidaqa.) 12 Innaarúnai fírana Yísuna moodáa naríaraa minánnai kai innaarúnai fírafa máridanoo. Ánutufa sía moo fásiqa maa-maqánasaa quqáseenoo minánnai innaarúnai óoru fúaqee qinau. Sía uqanna, Yísufa kai.

13 Miqóo súqimarusa faiqí firaasá Peetooroosa Yoohaneesa ufa irisoofanoo náaquqoofaqa tautúmaseeqa qiqau maaqandá sía sukúraki kéeqeemaruqanda káqi máruqanda máridaqa káaqa paasóosamandee ufa qímariaqanda máridaqa Yísuna faqa nímariaqanda miqídammia foo qiqau. 14 Faiqí áiku mandáikirafa miqóo Peetooroona faqa Yoohaneena faqa ámiqimasee kikíqinoo márufaqa faiqí ufa qímarusa miná qáfeeqa náqi fee qímasee qáoo qianau qímasee ufara randéemariqau. 15 Mi-rakisiráusa súqimarusa Peetooroosa Yoohaneesa niqiqámásoofaqa moosáa fufaqa nári miqóo máridaqa narínni narínni ufa qímariqau. 16 Misá maaqí qiqau, Maasá maa-fasiqaqandára náqimásee fee miqandára qáoo qianáuree. Yeerusaree máqusanaasa faqa ánaamuru misáki ani máriasa faqa aiqáma máa̱ moo áinaina firaa ainaina áuqunara íridaqa maasá faqa sía amana mi-ufánara qáoo qianáura akooqóo márifaqa. 17 Maasá miqandá sía káqi idukúanauranoo aaquqímannimaqasee idukúanaura maasá miqandá náaramaseeqa qumeéraaqée qianáura maa-ufána sía fífainianifeera qianáura maaqóo kai káaqa taikáanifee qianáura. 18 Miqí qímasee misá Yoohaneesa Peetooroosa náaramaseeqa qáoo qiqau. Sía uqanna Yísuna áuquara faqa miná ufara faqa sía kafáa kooroo qiaqa. Qumeé uqanna raaqée qiqau.

19 Peetooroosa Yoohaneesa misá úfa iriséeqa qiqau. Ínnee ínneeqá kai Ánutuna áfusaa andeeqára ainainara írimariasa máriafanoo. Maaqandá ínni ufamáu fee fuanáuree miná ufamáu fee fuanáuree. Maasá ínni ufamáu sía fuanáura Ánutuna ufamáu fuanáura. 20 Maasá Yísunara qáfee marúnna ainainara dáaqoo íri marúnna ainainara náqi fee másee kukéeqaanauree sía kukéeqaaqaa ira ainaina máridanoo.

21 Miqí qímasoofaqa miqóo súqimaru rakísirausa afeekaikámándee qáoo qímasee idukíqu. Misá náqimándee miqandá náriraree, sía amana. Faiqí ánaasee aiqáma qáfamaseeqa Ánutunara asasídaqa idí réemariqau. 22 Mi-moo ainainná áuqaisóo fasiqafa áiku mandáikirafa sía kumaaráafau qaara fasiqa níku nísauku taikásee aukuana áiqaróofaqa andeeqáqau, faiqí firaaná andeeqóonara asasídaqa minára idí réemariqau.

Yísuna faiqi námu suqúfiqa paasóosiranara Ánutunai innaaru qímariqau.

23 Misá miqandá idukúsoofaqa Peetooroosa Yoohaneesa nári níqoondunnai Yísuna ufa írimarusa márunnai fídaqa faiqí firaasá faqa rakísirausa faqa misá qáoo qírufa oosana oosanara qímannimiqau. 24 Miqóo márusa irisée aiqámausa moodáanaki Ánutunara asasamándee innaaru qíqa qiqau. Óo Karaambáiqa, Anée innaarúna faqa maqá faqa ooruku námmari faqa minakí mári ainaina óosana óosana faqa quqóonafa máriananoo. Anée aneenná náaquqara andeeqara maraqunannái aneenná aináinira faiqi Dafidinannai aní namuqáara qímannimiqoonnana Dafidifa óoqai minára maaqí qímasee ákara rinau.

Náqi fee qídee ánaamuru áanóo ídee,
Náqi fee qídee faiqí ánaasee únnamaanná qídee,
Maa-maqánasaa karaambáiqauqa írirana deedaqídaqa.
Rakísirausa suqúfi Ánutuna faqa narí ásauku mundírana faqa kurídiraree qídaqa.
Dafidifa miqí qímasee aní Ánutuna namuqáara ákara rinau.

27 Kúqaa maa-maqusánai Yeerusareenni Eeroodeesa Piraatoosa ánaamuru faqa Isaraee máqannaa faqa suqúfifaqa Ánutufa aní áaduma ámiqira ainainira faiqi aní ásauku mundírana áriraree qiqau. 28 Anée óoqeenaana aneenná afeekannái aneenná íriranannai kambíqaaninnanara qunáfa misá sía írirai anée qímaqoonna ufamau kai deedaqamándee áriqau. 29 Óo Karaambáiqa misá maasára sía faiqí ánaasee aníara qímannimianee qía. Anée misá aaquqírufa maasá qímaqimimarifana anée faqa íriananoo. Anée maasá dadaaqínaqa maasá aní aináinira fasiqausa paasóosamandee Yísunara faiqí ánaasee qímannimianaqa íriaqeera. 30 Óo Ánutu aneenná ásauku maasá qifaaqaí quqáseenana aneenná náaquqara faiqi Yísuna áuqunnai maasá náaquqara ainaina faqa faiqí aurínausa andeeqánnisarana faqa áuqusaanaqa qáfamasee aníara ánoonee qifáranoo. 31 Misá miqí qímasee innaaru qímasoofanoo misá máru maqafa faqa kásinau. Kásunakina Ánutuna náaquqara maraquna fannoo miqóo márusa naunduráki qumbíqafunara paasóosamandee Ánutuna ufa faiqí ánaasee qímannimimariqau.

Yísuna ufa írimarusa nári aináina narámi narámi ímariqau.

32 Yísuna ufa írimarusa moodáa íriranasaa moodáa naundurasáa máriqau. Sía moó fannoo moo áinainara qiníndi fée qinau. Káqi aiqáma ainaina aiqámausaindi fée qinóo márinau. 33 Yísuna afaaqasáa áqoondi namu ámiqimandee afeekaiká uqannámándee Yísufa kúqiranakiqari fíndifuna áufakiana qímannimimariqau. Miqímarunara Ánutufa dadaaqufaqa misá naríara naríara ámiqi ámiqidaqa áfaarimárufaqa faiqí ánaasee misára ámiqimáriasee qídaqa eedóo qímariqau. 34 Sía moó fannoo misáki nárainaina sárauímarufa márinau. Faiqí akaqáusa maqá fee máaqa fee moosá nimisée minásaa feefaurú maraséeqa Yísufa niqiqoo fásiqausa nímufaqa misá míniseeqa rainá rainámasee sárauímarusa nimana kái nímimariqau.

36 Miqí márufanoo faiqí moo áuqu Yooseefaafa Yísuna ákoona amaráfa mifá óoqeenaa fasiqa Yakooboona ámaaku Reefina níanasaaqaraa ati márinau. Mifá Sipurusa áfumaki kambíqoofa márinau. Yísufa niqiqoo fáiqi namusa mi-fasiqánara moo áuqu Baranabasi feé qímariqau. Mi-auqúna óosana faiqí ánaasee poodúqara fasiqee qímariqau. 37 Baranabasifa narí maqá moóna amiséenoo minásaa feefaurú maraséenoo Yísufa niqiqoo fásiqausa nímufaqa misá nárana máreemaría munnimmana síaisa qumáree rainásee nímiqau.